ആർട്ടിഫിഷ്യൽ ഇന്‍റലിജന്‍റ്സ് കമ്പനിയായ ഓപ്പൺ എഐ വാങ്ങാൻ 97 ബില്യൺ ഡോളർ വാഗ്ദാനവുമായി ശതകോടീശ്വരൻ ഇലോൺ മസ്ക്. ഒരുകൂട്ടം നിക്ഷേപകരും ഇലോൺ മസ്കും ഓപ്പൺ എഐ സിഇഒ സാം ആൾട്ട്മാനെ സമീപിച്ചെന്ന് വാൾസ്ട്രീറ്റ് ജേണൽ റിപ്പോർട്ട് ചെയ്യുന്നു. എന്നാൽ, ആൾട്ട്മാൻ ഈ വാഗ്ദാനം നിരസിച്ചു. കമ്പനിയുടെ നിയന്ത്രണം ഏറ്റെടുക്കാനും ലാഭേച്ഛയില്ലാത്ത മാർഗത്തിലേക്ക് തിരികെ കൊണ്ടുവരാനും മസ്കും അദ്ദേഹത്തിന്‍റെ നിക്ഷേപ സംഘവും ഓപ്പൺ എഐയുടെ ബോർഡിനോട് ഔദ്യോഗികമായി നിർദേശിച്ചുവെന്നാണ് റിപ്പോർട്ട്.
“സാം ആൾട്ട്മാനും നിലവിലെ ബോർഡും ഓപ്പൺഎഐ പൂർണ്ണമായും ലാഭേച്ഛയില്ലാതെ പ്രവർത്തിക്കുന്ന ഒരു കമ്പനിയായി മാറണമെന്ന് ആഗ്രഹിക്കുന്നുവെങ്കിൽ, അത്തരം വിപ്ലവകരമായ സാങ്കേതികവിദ്യയുടെ നിയന്ത്രണം നഷ്ടപ്പെട്ടതിന് ചാരിറ്റിക്ക് ന്യായമായ നഷ്ടപരിഹാരം നൽകേണ്ടത് പ്രധാനമാണ്,” മസ്കിന്റെ അഭിഭാഷകൻ മാർക്ക് ടോബറോഫ് പറഞ്ഞു.
മസ്കിന്റെ ഓഫർ നിരസിച്ചുകൊണ്ട് എക്സിൽ തന്നെ ആൾട്ട്മാൻ ട്വീറ്റ് ചെയ്തിട്ടുമുണ്ട്. ‘നന്ദി ഇല്ല, എന്നാൽ നിങ്ങൾക്ക് താൽപ്പര്യമുണ്ടെങ്കിൽ 9.74 ബില്യൺ ഡോളറിന് ട്വിറ്റർ വാങ്ങാൻ ഞങ്ങൾ തയ്യാറാണ്’ -എന്നായിരുന്നു ആൾട്ട്മാന്‍റെ പരിഹാസ രൂപേണയുള്ള ട്വീറ്റ്. ‘വഞ്ചകൻ’ എന്ന് ഇതിന് ഇലോൺ മസ്ക് മറുപടി നൽകുകയും ചെയ്തു. 2022ൽ 44 ബില്യൺ ഡോളറിനാണ് ട്വിറ്റർ ഇലോൺ മസ്ക് വാങ്ങുന്നതും പിന്നീട് അതിന്റെ പേര് എക്സ് എന്നാക്കി മാറ്റുന്നതും.
2024-ൽ ഓപ്പൺ എഐക്കെതിരെ രണ്ട് തവണ ഇലോൺ മസ്ക് കേസ് നൽകിയിട്ടുണ്ട്. ആദ്യമായി ജൂലൈയിലാണ് കേസ് നൽകുന്നത്. കമ്പനി അതിന്റെ സ്ഥാപക തത്വങ്ങളിൽനിന്ന് വ്യതിചലിച്ച് ലാഭം അടിസ്ഥാനമാക്കിയുള്ള ഘടനയിലേക്ക് മാറുകയാണെന്നായിരുന്നു പരാതി. ആഗസ്റ്റിൽ മസ്ക് വീണ്ടും കേസ് ഫയൽ ചെയ്തു. ലാഭം വർധിപ്പിക്കാൻ ശക്തമായ ‘ആർട്ടിഫിഷ്യൽ ജനറൽ ഇന്‍റലിജൻസ്’ സാങ്കേതികവിദ്യ വികസിപ്പിക്കുകയാണെന്നായിരുന്നു പരാതി.
ആദ്യകാലത്ത് ഓപ്പൺ എഐയെ പിന്തുണക്കുന്നവരിൽ ഒരാൾ കൂടിയായിരുന്നു മസ്ക്. കാലക്രമേണ, കമ്പനി സ്വീകരിച്ചരീതികളിൽ അദ്ദേഹം കൂടുതൽ അതൃപ്തനായി, പ്രത്യേകിച്ച് അത് ഒരു “ക്യാപ്പ്ഡ്-പ്രോഫിറ്റ്” മോഡലിലേക്ക് മാറിയതിനുശേഷം, കമ്പനി അതിന്റെ യഥാർത്ഥ ദൗത്യത്തിൽ വിട്ടുവീഴ്ച ചെയ്തതായി മസ്കിന് തോന്നി. അതോടെ ഓപ്പൺ എഐയുമായി ഇടയുകയായിരുന്നു. ഓപ്പൺഎഐയുടെ നേതൃത്വത്തെക്കുറിച്ചും എഐ സാങ്കേതികവിദ്യയിൽ അതിന്റെ സാധ്യതയുള്ള സ്വാധീനത്തെക്കുറിച്ചും മസ്ക് നിരവധി ആശങ്കകൾ പ്രകടിപ്പിച്ചിട്ടുണ്ട്.