ഉള്ളടക്കം എ.ഐ. അധിഷ്ഠിതമെന്ന് അടയാളപ്പെടുത്തുമെന്ന് മെറ്റ

എ.ഐ. നിർമിത ചിത്രങ്ങൾ, ഓഡിയോകൾ, വീഡിയോകൾ എന്നിവ അങ്ങനെയാണെന്ന് അടയാളപ്പെടുത്താൻ വിപുലമായ മാർഗങ്ങൾ സ്വീകരിക്കുമെന്ന് മെറ്റ. എ.ഐ. നിർമിത ഉള്ളടക്കങ്ങളിൽ ‘മെയ്ഡ് വിത്ത് എ.ഐ.’ പോലെയുള്ള വാട്ടർമാർക്കുകൾ സ്ഥാപിക്കുമെന്ന് മെറ്റ ഉള്ളടക്കനയം വൈസ് പ്രസിഡന്റ് മോണിക ബിക്കെർട്ട് വ്യക്തമാക്കി. എ.ഐ. അധിഷ്ഠിത ചിത്രങ്ങളുടെ പൊതുസവിശേഷതകൾ (ഇൻഡസ്ട്രി ഷെയേർഡ് സിഗ്‌നൽസ് ഓഫ് എ.ഐ. ഇമേജസ്) അടിസ്ഥാനമാക്കിയാകും ലേബലുകൾ. മേയ്‌മുതൽ ഈ സേവനം ലഭ്യമാക്കുമെന്നും മെറ്റ വ്യക്തമാക്കി.

തിരഞ്ഞെടുപ്പുകാലത്തെ വ്യാജ ഉള്ളടക്കങ്ങളുടെ പ്രചാരണങ്ങൾ തടയാൻ തിരഞ്ഞെടുപ്പ് കമ്മിഷൻ ഉൾപ്പെടെയുള്ള കേന്ദ്ര സ്ഥാപനങ്ങൾ സാമൂഹിക മാധ്യമസ്ഥാപനങ്ങളുടെ പ്രതിനിധികളുമായി നടത്തിയ കൂടിക്കാഴ്ചയിലും ഈ വിഷയം ചർച്ചയായിരുന്നു. ഇന്ത്യയിൽ ഐ.ടി. നിയമങ്ങളനുസരിച്ച് ഡീപ് ഫെയ്‌ക്ക് പോലെയുള്ള വ്യാജ ഉള്ളടക്കങ്ങൾ പ്രചരിപ്പിക്കുന്നത് ഒരുലക്ഷംരൂപവരെ പിഴയും മൂന്നുവർഷംവരെ തടവും ലഭിക്കാവുന്ന കുറ്റമാണ്.