പുതിയ എഐ സ്റ്റാർട്ടപ്പിന് തുടക്കമിട്ട് ഓപ്പൺ എഐ മുൻ ചീഫ് ടെക്നോളജി ഓഫീസർ മിറ മുറാട്ടി. തിങ്കിങ് മെഷീൻസ് ലാബ് എന്ന പേരിലാണ് തുടക്കം. ആർട്ടിഫിഷ്യൽ ഇന്റലിജൻസ് സാങ്കേതികതയെ ഫലപ്രദമായി ഉപയോഗിക്കാനും വ്യാപകമായി എഐ സിസ്റ്റങ്ങളെ മനസിലാക്കാനും വേണ്ടിയാണ് പുതിയ സ്റ്റാർട്ടപ് സംരംഭമെന്ന് മിറ വ്യക്തമാക്കി. ‘എല്ലാവർക്കും എഐ’ എന്ന ആപ്തവാക്യത്തിലൂന്നിയാണ് കമ്പനി പ്രവർത്തിക്കുക. എല്ലാവര്‍ക്കും മനസിലാക്കാവുന്നതും, കസ്റ്റമൈസ് ചെയ്യാനാവുന്നതും പൊതുവായ കഴിവുകളുമുള്ള എഐ സംവിധാനങ്ങളൊരുക്കുകയാണ് ലക്ഷ്യമെന് കമ്പനി പങ്കുവെച്ച ബ്ലോഗ്‌പോസ്റ്റില്‍ പറയുന്നു.
‘എഐ ഏറെ പുരോഗമിച്ചെങ്കിലും ചില വിടവുകൾ അവശേഷിക്കുന്നുണ്ട്. എഐ സംവിധാനങ്ങൾ എങ്ങനെ പരിശീലിപ്പിക്കപ്പെടുന്നു എന്നതിനെക്കുറിച്ചുള്ള അറിവ്, ഗവേഷണ ലാബുകൾ കേന്ദ്രീകരിച്ചാണുള്ളത്. ഇത് എഐയെക്കുറിച്ചുള്ള പൊതു രീതികളേയും എഐ ഫലപ്രദമായി ഉപയോഗിക്കാനുള്ള ആളുകളുടെ കഴിവിനെയും പരിമിതപ്പെടുത്തുന്നു. കൂടാതെ കഴിവുകൾ ഉണ്ടായിരുന്നിട്ടും ആളുകൾക്ക് ഈ സംവിധാനങ്ങൾ അവരുടെ നിർദ്ദിഷ്ട ആവശ്യങ്ങൾക്കനുസരിച്ച് രൂപകൽപ്പന ചെയ്യാൻ ബുദ്ധിമുട്ടാണ്’. ആളുകളുമായി സഹകരിച്ച് പ്രവർത്തിക്കുന്ന സുരക്ഷിതമായ നിർമിത ബുദ്ധി സാങ്കേതികത പ്രാവർത്തികമാക്കാനാണ് തിങ്കിങ് മെഷീൻസ് ലാബിലൂടെ ഉദ്ദേശിക്കുന്നതെന്നും സ്റ്റാർട്ടപ് സാമൂഹ്യമാധ്യമങ്ങളിൽ കുറിച്ചു.
30 ജീവനക്കാരാണ് തിങ്കിങ് മെഷീൻസ് ലാബിലുള്ളത്. ഇതിൽ ഭൂരിഭാഗവും ഓപ്പൺ എഐയിൽ നിന്നുമുള്ളവരാണെന്ന് റോയിട്ടേഴ്സ് റിപ്പോർട്ട് ചെയ്തു. ജോൺ ഷൂൾമാനാണ് മുഖ്യ ശാസ്ത്രജ്ഞൻ. ബാരറ്റ് സോഫാണ് ചീഫ് ടെക്നിക്കൽ ഓഫീസർ. ഓപ്പണ്‍ എഐ കൂടാതെ മെറ്റ, മിസ്ട്രല്‍ ഉള്‍പ്പടെ വമ്പന്‍ സ്ഥാപനങ്ങളില്‍ നിന്നുള്ള എഞ്ചിനീയര്‍മാരും ഗവേഷകരും അടങ്ങുന്ന സംഘത്തെയാണ് തിങ്കിങ് മെഷീന്‍സ് ലാബിനായി ഒരുക്കിയിരിക്കുന്നത്. കൂടുതല്‍ ഓപ്പണ്‍ എഐ ജീവനക്കാര്‍ തിങ്കിങ് മെഷീന്‍സ് ലാബിലേക്ക് പോവുമെന്നാണ് റിപ്പോര്‍ട്ടുകള്‍. കൂടുതല്‍ നിക്ഷേപകരെ ആകര്‍ഷിക്കാനുള്ള ശ്രമത്തിലാണ് കമ്പനി.
2018 ലാണ് മിറ മിറാട്ടി ഓപ്പണ്‍ എഐയില്‍ ചേര്‍ന്നത്. ചാറ്റ് ജിപിടിയുടെ നിര്‍മാണ ജോലികളില്‍ മുന്‍നിരയിലുള്ള വ്യക്തിയാണ് ഇവര്‍. സാം ഓള്‍ട്ട്മാന്‍ അപ്രതീക്ഷിതമായി ഓപ്പണ്‍ എഐയില്‍ നിന്ന് പുറത്താക്കപ്പെട്ട സമയം മിറ മുറാട്ടിയായിരുന്നു ഓപ്പണ്‍ എഐയുടെ ഇടക്കാല മേധാവി. അതുവരെ ഓപ്പണ്‍ എഐയിലെ ചീഫ് ടെക്നോളജി ഓഫീസര്‍ ആയിരുന്നു മുറാട്ടി.